Sjúkar orðræður

Laugardagur 10. mars kl. 13-14.30
Stofa 231 í Aðalbyggingu Háskóla Íslands

Á síðastliðnu ári var stofnaður rannsóknahópurinn Nordic Network in Narrativity and Medicine. Stjórnandi er Jens Lohfert Jørgensen, fyrrum lektor í dönsku við Háskóla Íslands. Ásdís Egilsdóttir tók þátt í að undirbúa umsókn til NOS-HS og sótti fyrsta vinnufundinn sem haldinn var í Kaupmannahöfn 9. – 10. desember 2011. Markmið þessa verkefnis er tvíþætt: að efla rannsóknir á orðræðu um sjúkdóma og lækningar í bókmenntum og hvetja til og móta kennslu í bókmenntum fyrir læknanema.  Slík námskeið eru þegar orðin að veruleika í ýmsum háskólum. Í málstofunni verður fjallað um margvísleg tengsl sjúkdóma, lækninga og bókmennta frá jarteinum miðalda til Þórbergs Þórðarsonar. Þá verður rætt um rök fyrir því að æskilegt sé að bjóða upp á bókmenntanámskeið fyrir læknanema.

Fyrirlesarar:

  • Ásdís Egilsdóttir, prófessor í íslenskum miðaldabókmenntum: Á bókmenntafræði erindi við læknisfræði?
  • Gunnvör S. Karlsdóttir, doktorsnemi í bókmenntum: Vígt lífgjafarvatn í trássi við kirkjuna
  • Soffía Auður Birgisdóttir, bókmenntafræðingur og sérfræðingur við Rannsóknasetur Háskóla Íslands á Hornafirði: Þórbergur Þórðarson og Lækningabók Jónassens

Málstofustjóri: Ásdís Egilsdóttir prófessor

Útdrættir:

Ásdís Egilsdóttir, prófessor í íslenskum miðaldabókmenntum
Á bókmenntafræði erindi við læknisfræði?

Reynt verður að svara spurningunni með vísun í starf rannsóknahópsins Nordic Network in Narrativity and Medicine. Greint verður frá helstu ástæðum þess að bókmenntanámskeið eru orðin valnámskeið í ýmsum háskólum.

 

Gunnvör S. Karlsdóttir, doktorsnemi í bókmenntum
Vígt lífgjafarvatn í trássi við kirkjuna

Í Jarteinabók Guðmundar góða Arasonar er sagt frá því að vígt brunnvatn hans hafi hrifið ungan prestsson vestur á Ströndum úr klóm dauðans.

Frásögnin er ekki síst áhugaverð fyrir það að greint er frá andstöðu föður drengsins og fleiri presta við brunnvígslur sem líklega hafa verið í trássi við kenningar kirkjunnar og kirkjulög. Fjallað verður nánar um þessa frásögn og aðrar skyldar.

 

Soffía Auður Birgisdóttir, bókmenntafræðingur og sérfræðingur við Rannsóknasetur Háskóla Íslands á Hornafirði
Þórbergur Þórðarson og Lækningabók Jónasens

Fjallað verður um tengsl texta Þórbergs Þórðarsonar við Lækningabók handa alþýðu á Íslandi eftir Jónas Jónassen landlækni sem kom út árið 1884.

Deila: 
Þú ert að nota: brimir.rhi.hi.is