Hugvísindaþing

 

Hugvísindaþing 8. og 9. mars 2019

Hugvísindaþing er árviss ráðstefna Hugvísindastofnunar þar sem fram er borið það helsta í fræðunum í stuttum fyrirlestrum og málstofum ætluðum fræðasamfélaginu jafnt sem almenningi. Þingið var fyrst haldið árið 1996.

Þingið verður sett í Hátíðasal Háskóla Íslands í Aðalbyggingu um hádegi föstudaginn 8. mars. Hátíðarfyrirlesari verður Stephen Greenblatt, bókmenntafræðingur, einn af upphafsmönnum hinnar svokölluðu nýsöguhyggju (e. New Historicism) og handhafi Holberg-verðlaunanna 2016. Að því loknu verður boðið upp á málstofur sem verða kynntar á sérstakri síðu þingsins.

Þingkall

Kallað er eftir tillögum að fullskipuðum málstofum á sviði hugvísinda. Hvatt er til þverfaglegra málstofa innan hugvísinda eða í samstarfi við aðrar fræðigreinar. Frestur til að skila inn tillögum er til 22. janúar 2019.

Málstofur verða að jafnaði með þremur eða fjórum fyrirlestrum (30 mínútur hver með umræðum), en heimilt er að senda inn tillögur að styttri eða lengri málstofum.

Skipuleggjendur málstofa (málstofustjórar) þurfa að senda tillögur sínar með tölvupósti til Hugvísindastofnunar, hugvis@hi.is, á sérstöku eyðublaði.

Eyðublað fyrir tillögur.

Nánar um skipulag þingsins:

  • Gert er ráð fyrir að hver fyrirlestur sé 20 mínútur og tæpar 10 mínútur til umræðna.
  • Að jafnaði er gert ráð fyrir að hver fyrirlesari haldi aðeins einn fyrirlestur á þinginu. Nánari upplýsingar um frávik frá því veitir verkefnastjóri Hugvísindastofnunar, hugvis@hi.is
  • Fyrirlestrar á þinginu eru að jafnaði á íslensku. 
  • Lýsing á málstofum birtist á sérstakri síðu þingsins, sem og útdrættir einstakra fyrirlestra.
  • Málstofustjórar safna einnig saman útdráttum í samvinnu við verkefnastjóra Hugvísindastofnunar, sem og myndum (einni fyrir hverja málstofu) til birtingar á síðu þingsins og miðla upplýsingum eftir þörfum til fyrirlesara.
  • Lokafrestur til að skila útdráttum er 8. febrúar. Æskileg lengd er 80-200 orð.

 

Málstofur verða metnar af starfsmönnum Hugvísindastofnunar sem leggja tillögu að dagskrá fyrir stjórn stofnunarinnar. Ef fleiri sækja um málstofur en pláss er fyrir verður litið til þess hvernig málstofurnar dreifast á fagsvið hugvísinda þar sem gætt verður að því að sem fjölbreyttust flóra hugvísinda komist að. Fyrirlestrar sem greina frá niðurstöðum rannsóknaverkefna sem ekki hafa fengið umfjöllun áður, hvort sem þau eru unnin af einyrkjum eða hópum, njóta alla jafna forgangs. Svör  frá Hugvísindastofnun munu berast eigi síðar en 30. janúar.

 

Margrét Guðmundsdóttir veitir nánari upplýsingar um þingið, hugvis@hi.is.

 

Deila: 
Þú ert að nota: brimir.rhi.hi.is